La Cassa per donns elementars dal Grischun paja ina contribuziun en cas da donns betg assicurabels vi da bains immobigliars e cultiras en consequenza da:
- burascas
- aua gronda
- inundaziuns
- lavinas
- pressiun da la naiv
- squatschs
- crudada da crappa
- sbuvaditschs
- bovas da glitta
- culps da chametg (senza fieu)
Resguardads vegnan donns:
- vi da bains immobigliars senza ils edifizis, objects sumegliants ad edifizis e bains movibels sin quel;
- vi d'indrizs per l'access e la segirada;
- vi da pumers, nuschers, chastagners, vits e chaglias da pumaraida, plantas e chaglias decorativas, chaglias da flurs ed autras plantas da cultira;
- vi dal guaud, sche dapli che 20 % da la provisiun da laina en pe per parcella èn donnegiads;
- vi da la creschientscha d'erva, sche l'erva n'era betg gia tagliada il mument da l'entschatta dal donn e sch'igl èn pertutgads en tut dapli che 10 % da l'entira surfatscha d'erva;
- vi d'ulteriuras cultiras agriculas, sch'ellas n'èn betg gia racoltadas il mument da l'entschatta dal donn e sch'igl è nunusità d'assicurar la perdita da racolta;
- vi da bains immobigliars ed indrizs tecnic-culturals da cooperativas en il senn da la Lescha da meglieraziun dal chantun Grischun.
Contribuziuns / persunas cun dretg a contribuziuns
La contribuziun da la Cassa per donns elementars importa 80 % da la summa dal donn imputabla. Da princip ha la proprietaria u il proprietari da l'object donnegià il dretg a l'indemnisaziun.